Gimenok adierazi du DBHko eta Batxilergoko ikasle sarituak "adibide argia" direla hezkuntzak Nafarroako herritarrek hobekien baloratzen duten zerbitzu publiko gisa duen arrakastarako
2024-2025 ikasturteko Derrigorrezko Bigarren Hezkuntzako eta Batxilergoko Sari Bereziak jaso dituzte gaur zazpi ikasle nafarrek, Carlos Gimeno Hezkuntza kontseilaria buru izan duen Nafarroako Jauregiko Tronu Aretoan egin den ekitaldian.
DBHn edo Batxilergoan horretarako egindako probetan kalifikaziorik onenak lortzen dituzten ikasleei ematen zaizkie sariak. Gimenok zorionak eman dizkie saridunei, eta esan du hezkuntza-arrakastaren “adibide argiak” direla, hezkuntza-zerbitzuekiko gogobetetze-maila Nafarroako zerbitzu publiko guztien artean altuena delako, Herritarren pertzepzioaren eta konfiantzaren inguruan Foru Exekutiboak ezagutzera emandako Inkestak egiaztatu duen moduan.
2024-25 ikasturteko DBHko sari bereziak honako ikasle hauek jaso dituzte: Aiuri Lasa Kamiruaga, Burlatako Askatasuna BHIko ikaslea; Monica Garcia Gasca, Tuterako Anunciata FESD ikastetxeko ikaslea; eta Leyre Trasierra Martin, Tafallako Sancho III el Mayor BHIko ikaslea. Bestalde, Nafarroako Foru Komunitateko 2024-25 ikasturteko Batxilergoko sariak honako hauei eman zaizkie: Samaa Kadri Kasmi, Corellako Alhama BHIko ikaslea; Marlen Gil Chivite, Corellako Arte eta Goi Mailako Diseinu Eskola; Iker Hualde Vaca, Iruñeko Mendillorri BHIko ikasle; eta Maria Isabel Mangado del Castillo, Iruñeko Monjardin Lizeoa ikastetxeko ikaslea.
Carlos Gimeno Hezkuntza kontseilaria Tronu Aretoan dauden ikasleei, haien senideei eta laguntzaileei eta ikastetxeko ordezkariei zuzendu zaie zorionak emateko eta “lehen eta eragin handieneko hezkuntza-nukleo” bezala betetzen duten rola azpimarratzeko, funtsezkoa baita balioak eta ohiturak transmititze aldera. “Ikasteko prozesuak ez du amaierarik, eta bizitza osoan zehar ikasten da”, gehitu du. Haren Departamentuak funtsezko helburua eta misioa dituela adierazi du; hau da, “kalitatezko eskola publikoa ezartzea, ekitatean oinarritua eta bikaintasunera bideratua”.
Ekitaldian parte hartu dute baita ere Hezkuntzako zuzendari nagusia den Gil Sevillanok eta Hezkuntzako Ikuskaritza Zerbitzuko zuzendaria den Alberto Urrutia Lecumberrik. Hezkuntzako zuzendari nagusiak sari horien ezaugarriak azaldu ditu, eta saritutako ikasleek lortutako emaitza akademiko bikainak eta ezagutza-maila handia nabarmendu nahi izan ditu. Era berean, jendaurrean eskerrak eman dizkio Hezkuntza Ikuskaritzako Zerbitzuari, eta esan du sari horiek pizgarri izango direla ikasleentzat beren bizitza-proiektuetan prestatzen jarrai dezaten. Iruñeko Pablo Sarasate Kontserbatorio Profesionaleko biola irakaskuntza profesionaletako bi ikasle, Asier Lara eta Marcos Muñoz, arduratu dira ekitaldiari musika jartzeaz, Kontserbatorioko irakaslea eta ikasketa-burua den Maria Fernandez Molinarekin batera.
Batxilergoko Sari Bereziak Hezkuntza Departamentuko Hezkuntza Ikuskaritzako Zerbitzuak ematen ditu. Saritutako ikasleek errekonozimendu ofiziala jasotzen dute, eta merezimendu hori haien espediente akademikoan agertuko da. DBHko deialdian parte hartu zuten ikasleek Gaztelania eta Euskal Hizkuntza eta Literatura, Atzerriko Lehen Hezkuntza eta Matematika izan zituzten aztergai. Batxilergoan, berriz, ikasleek idatzizko lehen proba bat egin zuten, eta Hizkuntza eta Literatura edo Espainiako Historia artean aukeratu ahal izan zuten, batxilergoan egindako modalitatearekin loturiko bigarren proba bat eta Atzerriko Lehen Hizkuntzako hirugarren proba.
DBHko deialdian saritutako pertsonek, errekonozimenduaz gain, 250 euroko diru-zuzkidura jasotzen dute. Batxilergoan, Nafarroako Foru Komunitateko ikastetxe publikoetan goi-mailako ikasketen lehen mailako gastuak ordaintzetik salbuetsita geratzen dira edo 400 euroko diru-zuzkidura jasotzen dute.
