Emantzipazioa, ongizatea, parte-hartzea eta informazioa, 2025-2028 aldirako Nafarroako Gazte Estrategia berriaren ardatzak
Nafarroako Gobernuak 2025-2028 aldirako Nafarroako Gazteriaren Estrategia berria onartu du gaurko bilkuran. Gazte populazioaren eskubideak eta aukerak bermatzeko ibilbide-orria izango da, eta lau jarduera-arlo estrategikotan oinarritzen da: emantzipazioa, ongizate integrala, gazteen parte-hartzea eta informazioa. Onartu ondoren, Etxebizitzako, Gazteriako eta Migrazio Politiketako Departamentua Gazteriaren Foru Lege berrirako aurretiazko kontsulten fasearekin hasiko da, Gobernu Irekiaren bidez.
Nafarroako Gazteriaren Institutuak (NGI) bultzatutako Gazteria Estrategiaren helburua da gazte-politiken eredu integrala, sektore artekoa eta parte-hartzailea sendotzea, nazioarteko esparru estrategikoekin bat datorrena finkatzeko helburuarekin jaiotzen da. Horrela, Nafarroako gazteriaren tokiko erronkei erantzuteaz gainera, garapen jasangarriaren eta inklusioaren horizonte global baten barruan kokatzen da.
Estrategia hori partaidetza-prozesu zabal batean oinarrituta prestatu da, eta 400 gaztek hartu dute parte. Prozesu horren helburua izan da gazteen eta Nafarroako gazte-politikei lotutako eragile nagusien beharrak, kezkak eta proposamenak jasotzea. Prozesua hainbat fasetan garatu zen 2024ko abuztutik 2025eko martxora bitartean. Guztira hamabi mahai sektorial antolatu ziren Nafarroako lurralde osoan, metodologia kualitatiboak eta kuantitatiboak konbinatuz, gazteen errealitatearen ordezkaritza anitza bermatzeko.
Hala, Nafarroako Gobernuak, NGIren bidez, Estrategia hori sustatzeko konpromisoa hartu du, tresna dinamiko eta malgu gisa, gazteen parte-hartzearekin gazteen beharrizan aldakorretara eguneratu eta egokituko dena. “Estrategia hau gazteen orainaren eta etorkizunaren aldeko apustua da, eta gazteen garapen osorako eta gizartearen parte hartzeko beharrezkoak diren baliabideak, eskubideak eta aukerak izango dituztela bermatzea ahalbidetuko digu”, adierazi du gaur Begoņa Alfaro hirugarren lehendakariorde eta Etxebizitza, Gazteria eta Migrazio Politiketako kontseilariak.
Horretarako, Estrategia arlo estrategikoen eta zeharkako printzipioen inguruan egituratzen da, eta, hori inplementatzeko, Nafarroako gazteen ongizatearen eta garapenaren alde lan egiten duten lurraldean hedatutako eragileen sare zabal baten parte-hartze koordinatua beharko da.
Lau arlo estrategiko
Gazte Estrategia berria egituratzen duten lau arloek Nafarroako gazteentzako politika publikoen ekintza eta garapena gidatu nahi dute, komunitate horretako gazteen garapen integralerako bidezko sarbidea eta beharrezko aukerak bermatzeko helburuarekin. Hala, arloetako bakoitzak esku hartzeko lerro kopuru bat du, gaur egungo gazteen egoerari buruzko aurretiazko diagnostiko batean antzemandako arazoei eta beharrei erantzuten saiatuko direnak.
Emantzipazioarekin lotutako aroari dagokionez, gazteek etxebizitza duina, eskuragarria eta egokia izango dutela bermatzeko helburua ezartzen du estrategiak, gazteen alokairua, etxebizitza babestua eta bizitegi-irtenbide berritzaileak sustatzeko neurrien bidez.
Era berean, gazteak kalitatezko baldintzetan laneratzea sustatzeko helburua planteatzen da, prekarietatea murriztuz eta gazteen ekintzailetza sustatuz. Arlo honetako hirugarren esku-hartze ildoa hezkuntza inklusiboa, berritzailea eta egungo gizartearen erronketara egokitua ziurtatzera bideratuta dago, ekitatea eta aukera-berdintasuna sustatuz eta autonomia pertsonalerako, sozialerako eta profesionalerako funtsezko gaitasunak garatuz.
Gazteen ongizate integrala hobetzeko, bigarren arlo estrategikoa, lau esku-hartze ildo planteatzen dira. Lehenengoa gazteen artean bizi-ohitura osasungarriak sustatzea da, jarduera fisikoa, elikadura orekatua eta adikzioen eta arrisku-jokabideen prebentzioa sustatuz. Bigarren helburua gazteek ongizate emozionaleko zerbitzuetarako sarbide zuzena eta azkarra izatea bermatzea da, osasun mentalaren prebentzio-, hezkuntza- eta komunitate-ikuspegia integratuz.
Ongizatea hobetzeko hirugarren esku-hartze ildo gisa, estrategiak pertsonen arteko harreman osasungarriak, inklusiboak eta errespetuan eta bizikidetzan oinarritutakoak sustatzeko helburua ezartzen du, hezkuntza afektibo-sexualaren, indarkerien prebentzioaren eta adostasunaren sustapenaren bidez. Esku hartzeko beste ildoetako bat da gazteen aisialdirako eskaintza anitza, irisgarria, parte-hartzailea eta kalitatezkoa bermatzea lurralde osoan, eta, esku hartzeko bosgarren ildo gisa, dokumentuak gazteen mugikortasuna bermatzea du ardatz, gazteen autonomiarako eta inklusiorako funtsezko faktore gisa.
Estrategiak jasotzen duen hirugarren arloa parte-hartzea da, eta beharrezkotzat jotzen du gazteen partaidetzarako egungo mekanismoak eraldatzea eta indartzea eta gizartean inplikatzeko modu berrietara egokitzea. Ildo horretan, bi helburu argi daude: lehena, gazteek bizitza sozialean eta komunitarioan parte har dezaten bultzatzea, beren antolamendu kolektiboa, boluntariotzat eta aktibismo soziala indartuz; bigarrena, partaidetzarako tresna berritzaileak sustatzea eta gazteen ordezkaritza indartzea prozesu instituzionaletan, kontsultarako eta eztabaidarako gune gehiagoren bidez, besteak beste.
Azkenik, informazio egiazkoa. Kontrastatua, eskuragarria eta garrantzitsua eskuratzea funtsezko eskubidea da gazteentzat, eta funtsezko tresna haien autonomiarako eta partaidetzarako. Hori dela eta, laugarren arlo estrategikoak, gazte-informazioari buruzkoak, funtsezko hiru helburu aipatzen ditu, honako honekin zerikusia dutenak: informazio egiazkoa, erabilgarria eta egokitua eskuratzeko aukera erraztea, prebentzio- eta sentsibilizazio-estrategiak garatzea 'fake news' eta gorroto-diskurtsoen aurrean, eta gazteen artean teknologia digitalen erabilera etikoa, inklusiboa eta segurua sustatzea, ingurune digitaletan modu aktiboan eta arduratsuan parte har dezaten sustatuz.
Horretaz guztiaz gain, zeharkako printzipioak ezartzen dira, Nafarroako Gobernuaren ekintzak eta politika guztiak bideratzeko eta ekimenak garatzeko ikuspegi integrala eta koherentea bermatzeko, esaterako genero-berdintasuna, inklusioa, jasangarritasuna, belaunaldien arteko justizia, lurralde-kohesioa, hizkuntza-aniztasuna eta kulturartekotasuna.
Eredu malgua, ebaluazioarekin eta jarraipenarekin
Gazteriaren Estrategiaren hedapena urteko plan operatiboen bidez egingo da, aldaketa sozial, teknologiko eta ekonomikoetara malgutasunez egokitzeko. Horretarako, adierazleen eta etengabeko ebaluazioaren sistema bat ezarriko da, ekintzen eragina neurtzeko eta, beharrezkoa izanez gero, lehentasunak birbideratzeko.
Nafarroako Gazteriaren Institutua arduratuko da haren ezarpena koordinatzeaz, Nafarroako Gobernuko beste sail batzuekin, toki entitateekin, gazte erakundeekin, eta gazteekin lan egiten duten gizarte eta hezkuntza eragileekin lankidetzan.
Estrategia honekin, Foru Gobernuak konpromiso batzuk hartzen ditu Nafarroako gazteriarekin, eta horiekin antzemandako behar guztiei benetako erantzunak ematea espero du, gazte politiken erreferentziazko komunitatetzat hartzea espero baitu, bai gauzatzen diren programa eta ekintzengatik, bai horiek gauzatzeko moduagatik.
