"Bakearen eta Bizikidetzaren aldeko Liburutegiak" programak 98 tailer sustatuko ditu ekaina eta iraila bitartean Nafarroako 44 liburutegi publikotan

Nafarroako Gobernuak, "Bakearen eta Bizikidetzaren aldeko Liburutegiak" programaren bitartez (Kultura eta Kirol Departamentuko Liburutegi Zerbitzua eta Memoria eta Bizikidetzako, Kanpo Ekintzako eta Euskarako Departamentuko Bizikidetza eta Giza Eskubideen Zerbitzuarekin lankidetzan), haur, nerabe eta helduentzako bederatzi proposamen presentzial jarri ditu Nafarroako liburutegi publikoen eskura, euskaraz zein gaztelaniaz. 

Programaren helburua topaketa, hausnarketa eta elkarrizketa bateratua sustatuko duten espazioak sustatzea da, hezkuntza-jarduera esperientzialen eskaintza baten bidez. Tailer horiekin, haurrek, nerabeek eta pertsona helduek bizipenak, emozioak eta iritziak partekatu ahal izango dituzte sorkuntza-proposamenekin, baita belaunaldien arteko formatuan ere, bizikidetzarekin eta giza eskubideekiko errespetuarekin lotutako balioen transmisioa aberasten baitute.

44 liburutegi inplikatu dira aurtengo ekainean, uztailean, abuztuan eta irailean 98 tailer sustatuko dituen ekimenean. Tailerretan hainbat gai jorratuko dira, hala nola nahi ez den bakardadea, zaintza, gizateriaren eta indarkeriaren garapenaren azterketa, gizarte-bazterketa, dantza komunitatea eraikitzeko arte gisa, topaketa desadostasun baten ondoren eta tokiko bizikidetzaren sorkuntza eta bitartekaritza eszenikoa.