Nafarroak harrera familia berriak bilatzen ditu eurenarekin bizi ezin diren adingabeentzat
Eskubide Sozialetako, Ekonomia Sozialetako eta Enpleguko Departamentuak sentsibilizazio-kanpaina bat jarri du abian, etxe bat bilatzeko eta gaur egun Nafarroako Gobernuaren babes-sistemako zentroetan bizi diren haurren kopurua murrizteko.
Familia-harrera hori aldi baterako neurria da, eta adingabeei familia-ingurune egokiago batean bizitzeko aukera eskaintzen die, haien garapen pertsonal eta sozial egokia bermatzearren. Horretarako, heldutasuna, egonkortasuna eta adingabeak zaintzeko nahiko baldintza fisiko eta psikikoak dituzten familiak behar dira, egonkortasuna emateko eta adingabea sare sozial zabalago batean integratzeko gaitasuna ez ezik, hezteko denbora eta arau sozialak eta balioak transmititzeko trebetasunak ere dituztenak.
“Nik nire haurtzaroa ematen dizut” sentsibilizazio-kanpaina gaur goizean aurkeztu du prentsaurrekoan Pertsonen Autonomia eta Garapenerako Nafarroako Agentziako zuzendari kudeatzailea den Ines Frances Romanek, eta jakinarazi du, egun, 260 adingabe baino gehiago Nafarroako Gobernuaren babes-sistemako zentroetan bizi direla. Agerraldian, Ines Francesekin batera izan da Chus Sádaba, Magale Elkartekoa (Nafarroako Harrera Familien Elkartea) eta bi anai-arreben harrerako ama, jada adinez nagusiak direnak.
Kanpainaren pieza nagusia spot bat da, eta iraupen desberdineko bertsioak ditu. Kontakizun subjektibo bat erabilita, emozioei dei egiten die oroitzapen-kutxa baten bidez, eta horrek babesgabetasun-egoeran dagoen adingabe batentzat familia batek etxean hartzeak esan nahi duen esperientzia sinbolizatzen du. Halaber, liburuxkak, kartelak, irrati-iragarkiak eta biniloak egin dira kanpoko errotulaziorako. Kanpainaren aurrekontua 30.000 eurokoa da, eta euskarri eta komunikabide ezberdinetan garatuko da urriko lehen hamabostaldian.
Ines Francesek bere hitzaldian nabarmendu du kanpainaren helburua dela etorkizuneko harrera-familiei helaraztea haien ekintzak adingabeentzat izan dezakeen esanahia: “Norbaitek bere haurtzaroa ematen dizunean, zure esku uzten du bera babesteko eta zaintzeko beharra, eta bere maitasuna ematen dizu. Norbaitek bere haurtzaroa ematen dizunean, zure haurtzaroa markatu zuen hura partekatzeko aukera ematen dizu: parkeko jolasak, autobuseko bidaiak… Norbaitek bere haurtzaroa ematen dizunean, erronka garrantzitsuena ere proposatzen dizu: bizi-proiektu bat eraikitzea zaintza eta segurtasuna, afektua eta auto-estimua oinarri hartuta. Bide horretan une errazak zein zailak egongo dira, familia guztietan gertatzen diren bezala”.
Informazio-jardunaldiak Nafarroa osoa zehar eta “Harrera-astearteak”
Horrez gain, hedapen-kanpaina osatzeko, informazio-jardunaldiak egingo dira datozen hilabeteetan Nafarroako eremu ezberdinetan, harreraren prozesuari eta modalitateei buruzko informazio guztia in situ emate aldera.
Modu horretan, informazio-hitzaldiak aurreikusi dira herri ezberdinetan, eta horiei beste batzuk gehitu ahal izango zaizkie zona berrietan: urriaren 16an, astelehena, Zizur Nagusian izango da 18:30ean, liburutegi publikoan; urriaren 19an, osteguna, Tafallan 18:30ean, herriko liburutegian; urriaren 23an, astelehena, Sarrigurenen (Eguesibar) 19:00etan; eta urriaren 26an, osteguna, Tuteran 18:30ean, Lourdes auzoko zentro zibikoan.
Kanpainan, baita ere, harrera-asteartetan parte hartzera gonbidatzen da. On line ekimen hori egitea pentsatu da interesatuta egon daitezkeen pertsonek edo familiek informazioa jaso eta zabaldu dezaten, beste pertsona eta erakunde batzuen esperientziaren eta testigantzen bidez.
Topaketa horietan, familia-harreraren errealitatea lehen pertsonan ezagutu daiteke adituen zein familien eskutik. Topaketetan, familia-harrera prozesu osoaren ikuspegi orokorra emango da, eta, esperientziak partekatzeaz gain, gai ezberdinak jorratu ahal izango dira ikuspegi desberdinetatik, betiere ikuspegi komunitario batetik.
Ekimena Europar Batasuneko Next Generation funtsen kontura finantzatzen da, Espainiako Gobernuaren Berreskuratze, Eraldaketa eta Erresilientzia Planaren onarpenarekin. Estrategia zabalago baten parte da, gainera, Pertsonen Autonomia eta Garapenerako Nafarroako Agentziak abian jarria Ereitegi kooperatibaren lankidetzarekin, eta horren helburua da familia-harrera bultzatzea, babes-sistemaren maila guztietan integratzea eta harrera-familiei beharrezko baliabideak bermatzea.
Harrera-familia izateko baldintzak eta prozedura
Familia-harrera legezko babes-neurri bat da, eta haur bat aldi baterako zaintzeko aukera ematen dio familia bati. Familia horrek konpromisoa hartuko du haurra zaintzeko, artatzeko, elikatzeko eta harrerak irauten duen bitartean prestakuntza integral bat ematen ahalegintzeko. Harrera bakoitzaren iraupena eta ezaugarriak haur bakoitzaren premien eta egoeren arabera adosten dira.
Edozein familiak, haren egitura edozein dela ere, hots, pertsona batek edo seme-alabak dituen edo ez dituen bikote batek, programan parte hartzea eska dezake. Gogorarazi behar da harrera ez dela adopzioa, eta, oro har, aldi baterako neurri bat dela, adingabea bere jatorriko familiatik irtetera bultzatu zuten zailtasunak gainditu arte.
Lehen urrats moduan, harrera-familia izan nahi duten pertsonek Nafarroako Gobernuko Familia eta Adingabeen Zuzendariordetzarekin jarri behar dute harremanetan, eta, horretarako, bide hauek erabil ditzakete: esteka hau, acogimiento@navarra.es posta elektronikoa edota 848421210 telefono-zenbakia.
Ondoren, familia-harrerari buruzko lehen informazioa jasoko dute familiek, modu indibidualizatuan edo taldeko informazio-hitzaldiaren bidez, Nafarroako Gobernuko taldeko profesionalek antolatuta.
Harrera-familia izatea formalki eskatzen duten familiei, Nafarroako Gobernuko teknikariek haien baldintza fisiko, psikiko eta sozialak baloratuko dizkiete, harrerarako motibazioak eta familia-ezaugarriak aztertzearekin batera. Halaber, etxez etxeko bisita bat egingo du, etxebizitzak eta inguruneak eskaintzen dituzten edukiera eta bizigarritasun-baldintzak ezagutzeko.
Egokitzat jotzen badira, pertsona horiek familia-zorroan sartuko dira, harik eta haiek har dezaketen haur bat egokitu arte. Lehenik, familiak proposamena jasoko du, eta onartu edo baztertu ahal izango du. Onartzen badu, adingabea eta familia prestatzeko, harremanetan jartzeko eta egokitzeko prozesu bat hasiko da, adingabea familiaren etxean sartu arte.
Familia eta Adingabeen Zuzendariordetzak familia-harreraren bilakaeraren segimendua egingo du, eta, prozesu osoan zehar, adingabeari, harrera-familiari nahiz familia biologikoari lagunduko die.
Familia-harreraren modalitateak.
Harrera-programa babesgabetasun-egoeran aurkitzen diren, Nafarroako Foru Erkidegoko
Administrazioaren zaintzapean dauden eta gurasoengandik banandu behar izan diren haurrentzat da, arretarik gabe egoteagatik edo portaera arduragabeak edo utzikeriak izan dituztelako gurasoek.
Legeriaren arabera, familia-harreraren bost modalitate daude, helburua eta iraupena kontuan hartuta. Hona hemen bost modalitate horiek:
1. Larrialdiko harrera. Premiaz edo Nafarroako Gobernuak haien babesgabetasun-egoera baloratzeko behar duen denboran zehar esku hartzeko beharra dutenei aplikatzen zaie. 0 eta 6 urte arteko haurrentzat da. Iraupen laburreko neurria da, gehienez ere sei hilabetekoa, adingabe horiek egoitza-zentroetan ez sartzeko, haien babesgabetasun-egoera aztertzen den bitartean.
2. Aldi baterako harrera. Neurri iragankorra da, eta haurra jatorrizko familiara itzul daitekeela aurreikusten da. Modalitate honen iraupena ezin da bi urtetik gorakoa izan.
3. Harrera iraunkorra. Legeriak ezarritako epean (2 urte) jatorrizko familiara itzultzeko aukera aurreikusten ez zaien haurrentzat da eta egonkortasun handiagoko neurri bat behar dutenentzat. Izaera mugagabearekin planteatzen da, eta adinez nagusi izan arte luza daiteke.
4. Harrera espezializatua. Kanpoko familia baten harrera espezializatua edo profesionalizatua ere izan daiteke. Premia bereziak (osasun-arazoak, portaera-arazoak, anai-arreba taldeak, etab) dituzten eta banako arreta behar duten adingabeentzat da. Harrerako pertsonak edo familiak hezkuntzaren edo gizartearen arloko prestakuntza eta haurtzaroari buruzko esperientzia espezifikoa izan behar ditu.
5. Etengabeko bizikidetzarik gabeko harrerak. Familia baten erreferentzia behar duten haurren zaintza sartzen da modalitate honetan, asteburu edota oporraldietarako, horrek bizikidetza egonkor bat izatea eskatu gabe.
