2024an larrialdi humanitarioko egoeretan berehalako erantzuna emateko esku-hartzeetarako dirulaguntzak

Esku-hartze jakin baterako dirulaguntza jasotzen duten erakundeek Garapenerako Lankidetzari buruzko martxoaren 9ko 5/2001 Foru Legearen 25., 27. eta 28. artikuluetan jasotako betebeharrak bete beharko dituzte, bai lankideei, bai boluntarioei dagokienez.

257E/2024 FORU AGINDUA, martxoaren 22koa, Eskubide Sozialetako, Ekonomia Sozialeko eta Enpleguko kontseilariak emana, zeinaren bidez deialdi bat onesten baita 2024. urtean larrialdi humanitarioko egoeretan berehala esku hartzeko dirulaguntzak emateko, banakako ebaluazioaren araubideari jarraikiz. Dirulaguntzen Datu Base Nazionalaren identifikazioa: 751383.

Krisi egoerei aurre egiteko gaitasun txikia duten populazio ahuletan naturak edo gizakiak eragindako hondamendien kopuruak gora egin izanak nazioartearen erantzun humanitario azkar eta espezializatua eskatzen du. Nafarroako erakundeek, gure Foru Komunitatearen gizarte kontzientziari adi, funtsak bideratzen dituzte giza tragedia horien ondorioak gutxitzeko eta herrialde eta herri pobretuen giza garapen iraunkorrean laguntzeko ekarpen solidario gisa. Funts horiek garapenerako laguntza ofizial gisa ematen dira, eta, zehazki, larrialdietarako laguntza humanitarioa emateko bideratzen dira.

Garapenaren aldeko Lankidetzari buruzko martxoaren 9ko 5/2001 Foru Legeak nazioarteko ekintza solidarioaren arloko printzipioak, helburuak eta bitartekoak ezartzen ditu, besteak beste. 14. artikuluan adierazten da, garapenaren aldeko lankidetzako ekintzak sustatzeko, besteak beste, diru publikoa erabiliko dela, eta, zehazki, 13. artikuluan adierazten da lankidetzaren modalitateetako bat laguntza humanitarioa dela, larrialdi egoeran edo berehalako arriskuan dauden populazioei laguntzeko eta horiek berregokitzeko laguntza ekonomiko gisa.

Isthanbulen 2016an egin zen Laguntza Humanitarioaren Munduko Gailurra gertatu eta gero, Nafarroako Lankidetzaren III. Plan Zuzentzaileak bere gain hartzen ditu "Grand Bargain" delakoaren konpromisoak, besteak beste ukitutako tokiko herritarren parte-hartzea, haien gaitasunen indartzea, haien eskubideen babesa eta erantzunen koordinazioa, hori guztia laguntza humanitarioaren oihartzuna eta eraginkortasuna hobetzeko helburuarekin. Horrez gain, larrialdi egoerei berehalako erantzuna emateko modua aurreikusten da, eta, hori da, hain zuzen, deialdi honen azken xedea.

Horrenbestez, urtez urte gertatzen diren nazioarteko larrialdiei berehalakoan eta arin erantzun ahal izateko, beharrezkoa da ekitaldi osoan zehar erabilgarri eta zabalik egonen den bitarteko bat edukitzea. Bitarteko hori, hain zuzen, banakako ebaluazioaren araubideko deialdi ireki bat da, helburu izanen duena 2024. urtean zehar gerta daitezkeen larrialdiei aurre egitea. Horrez gain, deialdi honek bermatzen du betetzen direla, batetik, publikotasun, gardentasun, lehia, objektibotasun, berdintasun, kontrol eta diskriminazio ezaren printzipioak, eta, bestetik, dirulaguntzak ematen dituen administrazioak finkaturiko helburuak betetzeari begirako eraginkortasun printzipioak, bai eta baliabide publikoak esleitu eta erabiltzeko efizientzia eta ekitate printzipioak ere.

Dirulaguntzei buruzko azaroaren 9ko 11/2005 Foru Legeak laguntza publiko guztiak arautzen ditu, eta bertan ezartzen dira haien printzipio orokorrak, kontzeptuak, irizpideak, eskumenak, eginbeharrak eta erantzukizunak, bai eta dirulaguntzak eman, kudeatu eta kontrolatzeko prozedura ere.

Nafarroako Gobernuak, 2024ko martxoaren 6an egindako bilkuran, baimena eman dio Eskubide Sozialetako, Ekonomia Sozialeko eta Enpleguko kontseilariari deialdi bat tramitatzeko, banakako ebaluazioaren araubideari jarraikiz, 2024. urtean larrialdi humanitarioko egoeretan berehala esku hartzeko dirulaguntzak emateko.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen bidez esleitu zaizkidan ahalmenak eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuaren bidez esleitutakoak erabiliz,

AGINTZEN DUT:

1. Onestea 2024. urtean larrialdi humanitarioko egoeretan berehala esku hartzeko dirulaguntzak emateko deialdia, zeina banakako ebaluazioaren araubideari jarraikiz ebatziko baita.

2. Deialdiaren oinarri arautzaileak onestea; foru agindu honen eranskinean jaso dira.

3. Guztira 270.000 euroko gastua baimentzea, 2024ra luzatutako 2023ko gastuen aurrekontuko "Nazioarteko larrialdiei berehalako erantzuna" izeneko 901001 91100 4819 143103 partidaren kargura.

Garapenerako laguntza ofizialei esleitutako partidetan gerakinik badago, baimendutako gastua 270.000 eurora arte handitzen ahalko da gehienez, dagozkion aurrekontu-gehikuntzak eginez. Zenbateko hori erabili ahal izateko, kreditu gehigarria baimendu beharko da Dirulaguntzei buruzko azaroaren 9ko 11/2005 Foru Legearen 31. artikuluan adierazten diren egoeraren bat gertatzen delako. Gastu gehigarriaren igoera baimendu eta argitaratzeak ez du berekin ekarriko eskaerak aurkezteko beste epe bat irekitzea, ezta ebazpena eman eta jakinarazteko gehieneko epearen kontaketa berriz hastea ere.

4. Foru agindu hau eta eranskinak Nafarroako Aldizkari Ofizialean argitaratzea.

5. Deialdi honen eta oinarri arautzaileen kontra gora jotzeko errekurtsoa jartzen ahal da, Nafarroako Gobernuari zuzendua, hilabeteko epean, argitaratu eta biharamunetik hasita.

6. Foru agindu hau igortzea, behar diren ondorioak izan ditzan, Idazkaritza Tekniko Nagusiko Administrazio Aferetarako Bulegora, Idazkaritza Tekniko Nagusiko Kontabilitate Zentrora, Diru-sarreren Bermearen eta Garapenerako Lankidetzaren Zerbitzura eta Dirulaguntzen Datu Base Nazionalera.

Iruñean, 2024ko martxoaren 22an.–Eskubide Sozialetako, Ekonomia Sozialeko eta Enpleguko kontseilaria, María Carmen Maeztu Villafranca.